tbz hat gestern ein textli geschrieben. warum nun ploetzlich was schweizerdeutsches ist bitz unklar. aber wohl weil sich der erste satz im kopf festgesetzt hatte und dann der zweite und der rest musste ebenso folgen. und dann erst noch berndeutsch. ach fragt nicht. wer mag, kann's lesen die andern lassen ;-) und aber auf jeden fall hier die initiative ausdrucken, unterschreiben. bisschen schweizergeschichte anschauen. http://www.wiedergutmachung.ch/ mercidankeadiö mi grossäti isch e verdingbueb gsi. do chan i itz ou nid vüu meh dezue säge. i weiss, dass er mi gärn gha het. und er het schön chönne zeichne. ganz schöni zeichnige het er mer i nes heft gmolet. muess das emou fürehole u wieder aluege. er hett schpöter e umfau gha, bi der arbet aus rangierarbeiter, wo nem öpper zuegschüfelet het (me hett chönne dankbar si). me seit, de sig er komisch worde nachär. u depressiv. i cha würklech nüt derzue säge. i weiss es eifach. aber er het mi gärn gha und er het ganz schöni zeichnige gmacht. mi götti, das wär denn ebe däm si sohn, isch ir chischte gsi. do weiss i irgendwie au e chli zwenig drüber. aber i ha nem de mou das buech gschickt, wo dr beobachter das usegäh het, über die administrativ versorgte u so, wüu i dänkt ha, villech isch er jo eine vo dene gsi? so isch es aber nid. er isch auso würklech irgendwie verurteilt worde. er hett nie akteisicht gha, drum weiss är säuber das ou nid eso gnau. gsersch bitz ir waldau, u denn haut ir chischte, sötsch ebe nid probiere z'flüchte. isch ebe scho verruckt, wie vüu es paar johr usmache. (eh jo, und mängisch blibt ou vüu glich). jedefaus het er nid is militär wöue und isch irgendwie dubet und de het er no e fründin gha wo z jung gsi isch, het emu ire vater, e polizischt, und s gsetz früecher grung gnue gfunge. isch jo glich, jedefaus het er e normali verurteilig gha und isch 8 mönet döt gsi. mi götti seit, z witzwiu, die administrativ versorgte, das sige armi sieche gsi. die heiges vüu schwärer gha aus die verurteilte. sie heige ne aube zigis düre zuun düre gä. är heig sini 8 mönet abgsässe und die sige de haut blibe. auso we de verurteilt bisch worde, de bisch scho besser dra gsi, wüu de ebe gwüsst hesch, wora de bisch. u süsch nid, bisch haut eifach blibe. -- = -- -- = -- -- = -- a n a . w o r d s aus dem hellblauen salon words@ana.ch http://ana.ch/words/ ana.txt seite 444 reicht ana.words weiter! vragen & kommentare & texte, die ihr davon findet, sie seien es wert, dass es die ganze welt erfaehrt, oder mindestens die redaktion, dann mailto:words@ana.ch du willst auch? immer mehr? dann abonnier auch du ana.words: http://ana.ch/txt/444
